مين انا؟؟؟؟؟؟؟؟؟؟؟؟؟؟؟؟

أنا مين ؟

( أنا 3 ) نائم و ( أنا 2 ) يجلس خلفه ينظر له في تمعن و يقف بجانبه ( أنا 1 )

أنا 1:- أنا .. يا أنا .. إصح يا أنا ..إنت نمت ولا إيه ؟

أنا 2:- لأ ما نمتش ولا حاجة ، أنا بس كنت بريح شوية ، أصل ( أنا 3 ) إمبارح تعبني قوي

أنا 1:- تعبك في إيه يعني ما هو إنت آكل شارب نايم ببلاش و قاعد فوق دماغة و ودانه و نازل زن ، ده حقه هو إلي يتعب

أنا 2:- أصله كان معصلج إمبارح قوي و ماكنش عاوز يسمع الزن بتاعي على ودانه

أنا 1:- أحسن ، ما هو إنت زهقته وقرفته و طلعت عنيه ، و كل مصيبة و مصيبة تلبسهاله و لولاش أنا جنبه و باقوله يلحق نفسه قبل الفاس ما تقع في الراس كان زمانه راح فطيس

أنا 2:- يبقى إنت السبب ، أنا عمال أزن على داغه و و أبقى خلاص هاقنعه تيجي إنت تضيع تعبي هدر

أنا 1:- ما هو إنت لو تبعد عنه هبقى مطمئن لكن إنت وراه وراه مش عاوز ترحمه ، إنت يعني هاتستفيد إيه من أذيته يا مؤذي

أنا 2:- يعني هو كان كيف عندي و مزاج .. ماهي شغلتي ، زي ما إنت بتشتغل بالظبط

( (أنا 3 ) يستيقظ و يتحدث إليهما دون أن ينظر لهما )

أنا 3:- إيه .. إيه.. إيييييه ؟ هو إنا ما أعرفش أنام أبدا ، كل شوية خناق و زعيق فوق دماغي

أنا 1:- قوم يا ( أنا 3 ) شوف ( أنا 2 ) عاوز يعمل فيك إيه ؟

أنا 3:- جرى إيه يا ( أنا 2 ) هو إنت ما بتهبطش أبدا يا أخي إرحمه و إرحمني و بطل زن بقى

أنا 2:- ( يقترب من أذنه ) بص يا ( أنا 3 ) إنت يقدر حد يمنعك عن شغلك ؟

أنا 3:- أبدا

أنا 2:- طيب أهو ( أنا 1 ) عاوز يمنعني عن شغلي

أنا 3:- عاوز تمنعه عن شغله ليه يا ( أنا 1 ) ؟ ما تسيبه في حاله

( ( أنا 2 ) يخرج لسانه لـ ( أنا 1 ) و يعمله فلفل بإيده )

أنا 1:- يعني أسيبه يعمل زي ما هو عاوز و يضيعك و يضيعني

أنا 2:- ( يتباكى ) شوف الظلم إهئ .. إهئ ، عاجبك كده يا ( أنا 3 ) ، مش أنا بجيبلك الحاجات إلي بتعجبك

أنا 1:- قصدك الحاجات إلي بتفضل تزن على دماغه لحد ما تغرر بيه ليها

أنا 2:- يا ( أنا 3 ) فاكر السيجارة إلي جبتهالك لما إنت كنت زهقان و كنت عاوز حاجة تعدلك دماغك و تروقك

أنا 1:- قصدك السيجارة إلي جبتهاله علشان يضر بيها صحته و عقله و لولاش أنا أقنعته إنه يرميها قبل ما يحود في الشارع إلي فات كان زمانا مشرفين في التخشيبة ، يعني كانت هاتكمل بتهمة

أنا 2:- طب بلاش دي ، فاكر البنت إلي ورتهالك في الشارع و خليتك تمشي وراها علشان إنت كنت معجب بيها و كنت عاوز تتعرف عليها ، مش كان زمانها مراتك دلوقتي

أنا 1:- أعوذ بالله يا أخي حرام عليك بقى ( أنا 3 ) يتجوز واحدة زي دي ، ده لولاش إنا بعد ما غمزتله هي علشان يطلع الشقة ، و أنا قلتله بلاش و إحترم نفسك أحسن ده ربنا شايفك ، كان زمانه دلوقتي معموله محضر في بوليس الأدآب

أنا 2:- طب بلاش دي ، خليك إنت معقد كده ، فاكر لما كنت إنت محتاج فلوس و كانت محفظة زميلك في الشغل سايبها على مكتبه و قام علشان يشرب و كانت مليانة فلوس ، مش كان زمانك خدت الفلوس و فكيت ديقتك

أنا 1:- أيوه .. و كان لبس قضية سرقة ، إنت ناسي ساعتها إن زميله رجع علشان ياخد المحفظة ، يبقى منظره إيه ساعتها و هو حاطط إيده في محفظة زميله ، إنت تقله خد و أنا أقوله ما تخدش ، إنت تقله خد و أنا أقول ما تخدش ، إنت تقله خد و أنا أقوله ما تخدش ، ولولا إني كنت صاحي ساعتها كان زمانه راح في داهية

أنا 2:- خليك كده .. إنت عاوزه معقد و دمه تقيل زيك

أنا 1:- الله يسامحك ، ده إنت إلي عاوزه يبقى منحل و يروح في ستين داهية

أنا 3:- كفاية بقى كفاية ، حرام عليكم إنتم إيه ما بتتعبوش ؟

أنا 1:- ماهو مستحيل أسيبك وياه لوحدكم يا ( أنا 3 ) لازم أفضل معاك على طول علشان أقدر أحميك منه

أنا 3:- أنا أقدر أحمي نفسي كويس

أنا 2:- و أنا مش حاسيبك ليه يا ( أنا 3 ) علشان يخيبك و يخليك أهبل

أنا 3:- ( يدفعه دون أن ينظر إليه فيوقعه ) ملاكش دعوه

أنا 1:- هو إلي يمشي على الصراط المستقيم بتاع ربنا يبقى ساذج و أهبل يا سي ( أنا 2 )

أنا 2:- طبعا .. لازم طول ما هو عايش يمتع نظره بالبنات الحلوة ، يعدل دماغة بكام سيجارة مالي هي ، يتمتع بكل قرش يقدر يحصل عليه من أي حته ، ولا زم يكدب على الناس علشان يقدر يكشف إلي جواهم ، و لازم يوقع الناس في بعضها علشان يقدر يقودهم ، فرق تسود يا أستاذ

أنا 1:- أعوذ بالله منك إنت إيه ؟ ، أنا مش عارف أنا قاعد معاك في حته واحدة إزاي ، ده إنت أفكارك تودي جهنم حدف

أنا 2:- و إنت رجعي ، لازم يبقى تقدمي

أنا 1:- هو التقدم لازم يبقى بالتخلف إلي إنت بتقول عليه ده !.. الله يخربيت التطور لو بالشكل إلي إنت بتقول عليه ده

أنا 3:- ممكن كفاية بقى و تقعدوا ساكتين ، أنا خلاص هاتجن منكم ( يمسك برأس ( أنا 2 ) و يريد أنا يصدمها في الأرض ) و هاخبط رأسي في الأرض

أنا 2:- ( ( أنا 2 ) يسحب رأسه من يد ( أنا 3 ) ) دي رأسي أنا

أنا 1:- أوعى تعملها يا ( انا 3 ) إنت ناسي إن إنا و (أنا 2) عايشين جواها

أنا 3:- ما هو ده إلي هايجنني ، إنت م ما بتبطلوش لك ولا خناق

أنا 1: بص يا (أنا 3) أنا بس عاوزك ما تسمعش كلام ( أنا 2 ) و أسلوبه في اللعب بالألفاظ علشان ينفذ إلي في هواه ، إنت ممكن تتقدم و تتطور و تتعلم و تتجوز و تكسب مال حلال كمان و كل الدنيا و الأخرة لو إتبعت ربك و دينك ن كل شئ يا ابن آدم إتسخرلك ، لكن ما تنشغلش بالحاجات إلي ليك عن ربك إلي إنت له ، لو قعدت تسمع كلام ( أنا 2 ) هاتضيع و هاتضيع عمرك في حاجات تضر وماتفيدش ، إرجع لعقلك يا ( أنا 3 ) إرجع لدينك .. و إرجع لربك

أنا 2:- ( يبكي و ينتحب ) إنهزمت تاني .. إنهزمت تاني

( ( أنا 1 ) و ( انا 2 ) يقفون خلف ( أنا 3 ) )

أنا 3:- عندك حق يا ( أنا 1 ) .. عندك حق ، لكن عاوز أعرف قبل كل ده .. ، أنا مين ؟!

( الثلاثة يرفعون أيديهم و حواجبهم في دهشة و تعجب )

ايه يا زيده اللى انت كاتبه ده
انا انهبلت بعدها يا راجل حرام عليك
والله جميله جدا بس تعبتنى جدا كمان
اما انت بقى تبقى العبد والشيطان
واتحتح روح سينيما والعلك دور دومنا
ههههههههههههههههههههههههههههه
موضوعك حلو يا قشطه

شكرا حودة لمرورك معلش اتاخرت فى الرد