كمال هو كاميليا
أتعرف علي هايدي علي النت علي انه بنت و بدأ يرسم عليها الحب
حتقولولي ازاي يعني و الصوت عمل فيه ايه تعالوا معايا و انتم تعرفوا و علي فكره هما مش عايشين في نفس البلد
كمال:هاااي ,ممكن نتعرف
هايدي:هااااي
ممكن اعرف الأول مين معايا و جبت ايميلي ازاي؟
كمال:انا ياسيتي كاميليا و كنت بعمل سيرش علي الأم أس أن و طلعلي ايميلك و الصراحه شدني فقلت اتعرف عليكي
ها قولتي ايه؟
هايدي:معنديش مانع
بس معلش ممكن نتكلم مايك الأول عشان أتأكد انك بنت
كمال:أخ
بنت اللئيمه
طب ممكن ثواني بس لحد ماظبط الماكيد عندي
هايدي:خودي وقتك
ياكاميليا
ايوه ياكمال فيه ايه؟ ماتهمد شويه سيبني اكمل اللي في ايدي
تعالي يابت بسرعه محتاجك
ياكمال هو ده وقته
يابت مش اللي في بالك تعالي بس بسرعه و حفهمك
ها ياسيدي عايز ايه؟
بصي حتكلم مع البت دي علي اني بنت وانتي حتكلميها في المايك علي انك أنا و حكون جنبك اتفقنا؟
و عايز يعني تكلمها ليه؟
حفهمك بعدين ياغشيمه
المهم يالا عشان البت مستنيه بدل ماتروح مننا
المهم اتعرفوا علي بعض و خدوا و ادوا في الكلام و هايدي بدأت تستريح لكاميليا اللي كل كلمه بيكون قايلهالها كمال عشان تقولها لهايدي
في يوم حست هايدي ان كاميليا متضايقه فسألتها مالك؟
كاميليا:مفيش حاجه
هايدي:لأ فيه
ايه ليه بتخبي عني؟
مش احنا بنحب بعض
كاميليا:اه بنحب بعض طبعا بس أنا مش عايزه اشغل بالك
هايدي:تشغلي بالي ده ايه
طمنيني عليكي انا بجد قلقانه اوي
ايه الحكايه؟
كاميليا:بصراحه كنت مستلفه مبلغ من ناس اعرفهم و دلوقتي بيطالبوني بيه و مش عارفه اعمل ايه
هايدي:و لا يهمك انا حبعتلك المبلغ اللي انتي عايزاه
كاميليا:لأ ياهايدي انا مش بقولك عشان تعملي كده ممكن ماتفتحيش الموضوع ده تاني معايا ارجوكي
انا مش شحاته
هايدي:حبيبه ألبي و مين يقدر يقول عليكي شحاته دأنتي حبيبه ألبي من جوه
مش أحنا واحد ياحبيبتي؟
كاميليا:اه
هايدي:طب ايه؟
يعني أنا لو في نفس موقفك و احتجت للفلوس مش حتديني؟
كاميليا:لأ طبعا لو أقدر حديهوملك
هايدي:خلاص يبقي أتفقنا
المهم كل ده كان من تدبير كمال مع كاميليا عشان ياخدوا كل اللي يقدروا عليه من هايدي
و طبعا كل مابيحتاجوا فلوس كل ماجرعه الحب و الحنان من كاميليا لهايدي بتزيد
النهارده عيد ميلاد كاميليا
قعدت هايدي تفكر حتعملها ايه و تجيبلها ايه و خصوصا انهم هما الأتنين مش عايشين في نفس المكان
كل سنه و انتي طيبه ياحبيبه قلبي
كاميليا:ياااه معقوله فاكره عيد ميلادي ياحبي
هايدي:بذمتك ده يوم يتنسي برضه
دأنا بقالي اسبوع عماله بفكر اجيبلك ايه من هنا
كاميليا:ياحبيبه ألبي ماتكلفيش نفسك كفايه وجودك في حياتي ده اغلي هديه عندي
هايدي:ربنا يخاليكي ليا ياكوكو بجد انتي مفيش منك اتنين معقوله فيه حب بالشكل ده بتخافي اد كده تكلفيني
انا عمري كله فداكي ياروح ألبي انتي
المهم ماتخدنيش في دوكه تحبي ايه اجيبهولك في عيد ميلادك؟
نفسك في ايه؟
ايوه ايوه انتي من فتره كنتي بتقوليلي ان نفسك في لاب توب ايه رأيك لو اجيبلك واحد من هنا؟و لا تحبي ابعتلك الفلوس و انتي تجيبيه من عندك؟
كاميليا:أحسن تبعتيلي الفلوس و اجيبه من هنا يمكن يكون أوفر شويه
مرسي ياحبيبه ألبي
ربنا مايحرمنيش منك
المهم كاميليا و كمال قعدوا يتكلموا شويه
كاميليا بدأت تزهق من تمثيل دور الحب علي هايدي و يمكن بدأ ضميرها يوجعها او
يمكن بدأت تخاف لما هايدي قالتلها ان فيه احتمال تنزل اجازه عشان تشوفها فقال اوبه
حنتكشف
المهم بدأت تبعد حبه بحبه و هايدي حست
بدأت تختلق المشاكل و تغلس علي هايدي و هايدي صابره و مستحمله
و فجأه بدأت لا ترد علي مكالمات هايدي و لا ايميلتها
بدأت هايدي تطاردها صبح و ليل عايزه تعرف ايه الحكايه
كمال قرر انه يكلمها و يقولها علي الحقيقه يمكن تحل عنهم
بصي ياهايدي الحدوته كلها كانت متفبركه لا فيه حب و لا فيه كاميليا و انا اللي كنت مفطم كاميليا علي كل حاجه بتقولهالك
طلعينا من دماغك بقه عشان مانوجعش دماغك و نقرفك
كانت صدمه عمرها
ليه ده حصل؟دي حتي حبت كاميليا اوي و كاميليا كانت بتقولها انها بتحبها اوي و انهم حيفضلوا طول العمر سوا
ايه اللي غيرها؟يكونش واقعه في ورطه و خايفه تقولي ؟
كانت شايفه انها احسن واحده و اطيب واحده قابلتها في الدنيا و افتكرت ان الدنيا ضحكتلها
ياتري هايدي كانت غلط لما سلمت ألبها لكاميليا و لا غلط في انها بعتتلها فلوس و لا في انها
قعدت تعمل تشات معاها علي النت؟
موضوع: حب دوت كم 
الأربعاء فبراير 20, 2008 5:34 am
