الصداقة مابين البنت والولد (الموضوع مفتوح للمناقشة)

السلام عليكم ورحمة الله وبركاته

الصداقة مابين البنت والولد

عن ظاهرة الصداقة المنتشرة مابين البنات والشباب اسمحولى اقول للبنت والولد كلمتين قبل ماادخل فى الموضوع
بقول للبنت.. حبيبتى من قلة البنات تبقى صديقتك (ولد)
وبقول للولد.. من قلة الولاد يبقى صديقك (بنت)

دى كانت البداية وكملوا معايا لكن ...من غير زعل..

الى البنات..

حبايبى ازاى بتقدروا تكلموا ولاد فى التليفون .. مبتحسوش ولو للحظة انكوا بتعملوا حاجه غلط.. ايوه اكيد عارفين انه حاجه غلط .. لانكوا مش بس بتكلموا ولاد فى التليفون ده انتوا كمان اول مابتحسوا ان بابا او ماما او اخوكى او اختك قريبين منك بتكلميه كأنه بنت .. يعنى بتكدبى على أهلك.. بالاضافه لكده فواتير التليفون اللى بتيجى مرتفعة مش بتحسى بالذنب لانها من كلامك مع ولد مش واحده صاحبتك..

ممكن تقوليلى احنا بنتكلم كلام عادى ..
فهقلك وليه متتصليش بصاحبتك بدل ماتتصلى (بصاحبك) مش كله كلام
هتقوليلى مش عارفه ليه بيحصل ده بس بحس براحه اكتر وانا بتكلم معاه فبفضله على صحباتى
فهقلك اكيد طبعا هتحسى براحه لان الشيطان موجود.. امال هو لازمته ايه .. ده يبقى فشل فى مهمته لو ماخلاكيش تفضلى صاحبك على صاحبتك
ياترى هتسيبى الشيطان هو اللى ينتصر ولا هتنصرى حبك لربنا وأّمانتك مع أهلك
..لكى الاختيار..

عارفه حبيبتى ممكن تقوليلى الملل والزهق هما اللى بيدفعوكى لكده وكمان انك شايفاهاه انها بقت حاجه عادية كل البنات بتعملها..
حبيبتى والله انا حاسه بيكى
الملل
والفراغ
ويمكن مفيش حد حاسس بيكى لامن صحباتك ولامن اهلك
ويمكن الشخص ده اكتر واحد بيفهمك
وحاجات تانية كتير..
لكن اسمحى لنفسك انك تفكرى ولو دقيقه واسألى نفسك (هل انا راضية عن نفسى وانا بكلم ولد؟؟)
( ياترى ربنا راضى عنى وانا بكلم ولد ولا مش راضى وزعلان منى) جاوبى على الأسئلة دى بصراحه
لازم تجاوبى دلوقتى.. قبل ماتتسألى من الملكين فى القبر ومن ربنا يوم القيامة..

وسيبك من البنات اللى حسسوكى انها حاجه عادية لان زى مافى كتير بيكلموا ولاد فى الاكتر منهم مش بيكلموا ولاد
وكمان احنا كلنا فى الهوا سوا ..فمثلا انا زيك مش بلاقى حد معايا ومش بلاقى حد يفهمنى واخواتى ولاد ومامتى وبابا مش موجودين يعنى طول اليوم لوحدى .. يعنى وحده من كل النواحى .. لكن عمرى مافكرت اصاحب ولاد
ممكن تقوليلى يمكن يافجر مفيش ولد فكر يكلمك وحاول يكسب صداقتك فخللى الطابق مستور
ههههههههه
بصراحه كنت اتمنى لكن للأسف كتير حاولوا يكلمونى ويكسبوا صداقتى لكن ده طريق وكل واحد بيختار طريقه وانا مختاره طريقى ان كلام او صداقة الولاد ممنوع لان زى ماقلت فى البداية مش من قلة البنات اصاحب ولاد او اكلم ولاد او اطلب حاجه من ولاد.
وكمان بنات كتير زيّنا مش بيكلموا ولاد فاتشجعـــــــــــــى
ولو كنتى انتى بتكلمى ولد قوليها لنفسك
مش هكلم ولاد تانى
واستغفرى ربنا
وأأكد ليكى انك هتذيدى فى نظر نفسك مليون مره وكمان هتذيدى فى نظر اى ولد كنتى بتكلميه مليون مره
بس لازم ماترجعيش تكلميه تانى وماتقوليليش مقدرتش ومش هقدر.. لازم تصممى .. وساعدى نفسك وابعدى عن الاسباب اللى بتساعدك انك تكلميه وادعى ربنا انه يعينك وان شاء الله هتلاقى نفسك بقيتى قادرة تعيشى من غير كلام ولاد.

الى الشباب..

اسمحولى أسألكوا واتمنى الاقى اجابات منكوا
انتوا بتستفادوا ايه لما بتكلموا بنت فى التليفون ولما بتخرجوا مع بنت؟؟؟
لو كانت البنت دى اختكوا كنتوا هترضوا ده ليها
هتقوليلى احنا اخواتنا البنات مايعملوش كده اصلا
فأنا هقول ليكو حديث للرسول صلى الله عليه وسلم(حب لأخيك ماتحبه لنفسك) مادمتوا انتوا مابتحبوش يحصل ده لاخواتكوا وماترضوش بيه ليهم يبقى فى نفس الوقت ماترضوش بيه لبنات الناس واعتبروهم اخواتكم

ممكن فعلا الاقى شباب بيقول عادى وفيها ايه لما اكلم بنت ومافيهاش حاجه لما اختى تكلم ولد
بصراحه لو كان فى شباب كده يبقى ونعم الرجوله.. ولاتعليق

وطلب صغير من شباب منتدى استاذ عمرو خالد
ياريت شباب المنتدى يوضحوا للبنات نظرتهم ايه للبنت اللى بتتكلم فى التليفون مع ولد ولو كانت البنت دى اختهم كانوا هيتصرفوا معاها ازاى؟؟؟

الموضوع ده كبير واتمنى ان الشباب والبنات يشاركوا بوجهات نظرهم وبأرائهم
الصداقة موضوع حاليا فى غاية الأهمية وفى نفس الوقت فى غاية الخطورة ولازم مناقشة وتوضيح من جانب جميع الأطراف

أشهد أن لاإله إلا أنت سبحانك أستغفرك وأتوب إليك
واستودعكم الله

انا نفسى ما اعرفش بنات خالص
غير اللى انا بحبها
وهيا كمان نفس الموضوع وانا واثق من كده
الصداقه بين البنات والشباب بتكون ايام الجامعه بس
لمصلحه معينه ولو خلصت فترة الجامعه المفرض الصداقه دى تنتهى
ده رايي

مرسى لمرورك ورايك
والصداقه ايام الجامعه بتكون ف حدود
ومفيهاش تليفونات ولا الكلام الفاضى ده

اوك انا بأيدك انه مش ممكن يكون في صداقة بين البنت والولد هدا موضوعك
طيب ايه رأيك باللي بتقول زي اخويا شو بتسميها هاي القصة؟
اللي منتشرة كتير عندنا بفلسطين

انا منكرش ان كان ليا اصحاب كتير ايام الجامعه
بس كانوا اصدقاء وكنا محترمين مع بعض جدا
لدرجة ان لحد دلوقت بنعزم بعض على افرحنا وكده
بس ما اضمنش كل الولاد يكونوا بالثقه اللى انا كنت باخاف بيها على اصحابى

مرسى ميدو وبحبك يا ميدو
ع مروركم ومشاركتكم الجميله
وجميل اوى انكم تعزموا بعض ع افراحكم
ياريت كل الناس تكون كده محترمه
وتكون محل ثقه

سانكس ليكى انتى على موضوعك التوبيك الرائع
والى الامام

بشكرك ياحلى توتا في العالم على التوبيك ده...

وبجد كنا محتاجين حد جريء يفتح موضوع زي كده علشان البنات تصحى وتفوق شويه من اللي هي فيه وطبعا

قصدي اللي بيتكلمو مع ولاد يعني او حتى العكس وفعلا لو كل واحد من الشباب حط نفسه في الوضع ده يتخيل

ان اخته بتتكلم مع شباب على التيليفون اعتقد ان رد فعله هيقى صعب جدا ......كل المطلوب شوية احساس

بالمسؤوليه مش اكتر من البنات والولاد لو مش علشان خاطر رضى اهلنا يبقى علشان رضى ربنا ولو انا الاتنين

اهم من بعض.

ولتاني مره بحيكي ياتوتا على الموضوع الجميل جدا ده

مرسى ضى القمر ع كلامك الجميل واهتمامك بالموضوع

عايز اقول حاجه بس بصراحه الفكرة دى مش نابعه منى انا لاكن نابعه من فكر الاستاذ عمرو خالد اللى انا بحبه كتير جدا واتمنى انى اكون فى يوم اعمل حاجه لبلدى ذيه

اولا لو انتى مصاحبه ولد وجمعتكوا الظروف انكوا تكونوا راكبين عربيه قوليلوله :الله مش اختك دى اللى مع الواد ابو عربيه (كدبه طبعا) لو صاحبك اتفزع وقال فينازاى مش ممكن حتعرفى انه ما بيخافش عليكى ع الاقل ذى اخته
ولو قال عادى اه يبقى مش هو الراجل اللى انتى تستحقيه
وفكرى كويس لان ما فيش بنت بتكلم ولد غصب عنها والقرار فى الاول والاخر للبنت
وشكرا ع الموضوع الجامد يا توتا

مرسى زيدا لرايك ومشاركتك
وياريت كل الناس بتفكر زيك
ربنا يهدينا جميعا

المرسى ليكى

شكرا ليكم كلكم

» الا الصديق
» الصداقة.....
» معني الصداقة
» حماية الصداقة
» كيف تضع صورة في الموضوع